التحذير من مخاطر استعمال الكورتيكويد لزيادة الوزن عند النساء

#المعلومة_رقم_1: الغدة الكظرية هي واحد الغدة جاية فوق الكلوة فيها 4 طبقات كل طبقة كتفرز هرمون… و الطبقة الثانية هي لي كتفرز “الكليكو-كورتيكويد= الكورتيزول” #استنتاج: الكورتيزول كاين طبيعيا في الجسم (وا احتافضولي بهاد المعلومة هانا راجعة لها)

#المعلومة_رقم_2: ما دام كاين هاذ الكورتيزول فالجسم طبيعيا فلأنه عندو أدوار: على حسب الحالة لي كيتواجد فيها الجسم فالكورتيزول كيريكل بزاف د الحوايج : طاح السكر–> كيطلعو – كيهدم البروتينات باش يعطينا أحماض أمينية نصنعو بيها بروتينات اخرين حسب الحاجة – كينشط صنع الأحماض الدهنية – كيشد الصوديوم فالجسم و ما كيخليهش يدوز فالبولة و بالتالي كيخليلي ضغط دموي مقاد (حيت الدم=ماء و الماء كيتبع الصوديوم و يلا نقص الماء كطيح الطونسيون ) – الكورتيزول كيكبح جهاز المناعة و ما كيخليهش مهوّر – الكورتيزول عندو مفعول مضاد الالتهاب مهم (وا ركزولي حتى على هاذ المفعول التالي هانا راجعة ليه)

#المعلومة_رقم_3: الكورتيكويد لي كنعطيو كدواء هي مشتقات مصنعة للكورتيزول، فهي في نهاية المطاف غير كتضخم مفعول الكورتيزول لي ديجا كاين فالذات… و على حسب المفعول لي بغينا نوصلوليه (حسب المرض) كنعطيوه بجرعات مختلفة و لفترات زمنية مختلفة…

نزيد نبسط ليكم: الجرعة د الكورتيكويد لي غادي نعطي لطفل عندو مرض فالكلية بحال syndrome néphrotique خصها تكون مضوبلة و لمدة زمنية أقلها 4 شهور و نص… أما يلا عطيتو فالتهاب الجيوب الأنفية مثلا راني غنعطيه بجرعة بسيطة و على أكبر تقدير مدة 10 أيام…

في طب الأطفال: الكوتيكويد يستعمل في غالب الحالات لمفعوله #المضاد_للإلتهاب لأنه مضاد الالتهاب الوحيد المسموح به للأطفال أقل من ستة أشهر و لي نقدرو نستعملوه في الأشهر الأولى للرضيع… و هنا كنعطيوه عادة بجرعات ضعيفة و لمدة تتراوح بين ثلاث و سبع أيام فقط، و هو لي كيفك الوحلة فاش كتجيبو الولد عندو ثلاث أشهر مخنوق و زرق و كيكح ريْتو و سدرو كيصفر إيوا شنو تعطيه الكورتيكويد و لا توجد سكسو؟؟؟؟

#المعلومة_رقم_4: صحيح الكورتيكويد عندو أعراض جانبية قبيحة بحال ارتفاع السكر في الدم (وا رجعو للمعلومة رقم 2 و انتما تعرفو علاش…حيت كيفما قلتلكوم الكورتيكويد كيضخم أدوار الكورتيزون الطبيعية) كيهدم البروتينات بكثرة حتى هادوك ديال العضم و بالتالي كيتسبب لينا فهشاشة العظام، كيغلض حيت كينشط انتاج الدهنيات و كيرفع الضغط الدموي حيت كيشدنا الصوديوم و الماء فالذات و ما كيخليهمش يتصفاو فالكلوة و زيد و زيد…

#ولكن: لي خصنا نفهمو هو كل ما كانت الجرعة لي كناخدو كبيرة و المدة طويلة (فوق ثلاث أشهر) كلما الأعراض الجانبية كتبان و كلما كانت الجرعة صغيرة و المدة بسيطة (تحت عشرة أيام) ما كيكونش الخطر …. صافي فهمتو

و بالنسبة للأشخاص لي كياخدو هذا الدواء مدة طويلة كيخصهوم ياخذو بعض التدابير الوقائية للحد من الأعراض الجانبية: ما ياكلوش الملحة باش نقصو من الصوديوم لي داخل للجسم و هكذا نقدرو نحدو من ارتفاع الضغط الدموي، يحبسو من تناول الحلويات و السكر باش ما يطلعش فالدم، كنعطيوهم مكملات البوتاسيوم و الكالسيوم حيت كينقصو فالدم مع الكورتيكويد، و كل مرة طلعت السخانة او كان شي تعفن خصنا نداويوه دغيا حيت المناعة كتكون ناقصة مع الكورتيكويد …و نعاود نقولها #لي_كيتخاد_مدة_طوييييييلة

فاش كنبغيو نحبسو الكورتيكويد لي تخاذ مدة طويلة كنحبسوه تدريجيا حيت الغدة الكظرية كتكون تعلمت العكز و ما كتبقاش تقريبا تفرز الكورتيزول ديالها…فيلا جيت و حبست دقة وحدة غيوقعلها صدمة عاطفية و ما غتبقاش خدامة كاع …و هذا أمر خطير(المعلومة رقم 1 رجعولها)